ഷാരൂഖ് ഖാനും രക്ഷയില്ല, വമ്പൻ ബോളിവുഡ് പടങ്ങളെ വീഴ്ത്തി ഒരു കൊച്ചു ചിത്രം; ഇനി ലക്ഷ്യം കെജിഎഫും പുഷ്പ 2 വും

ജഗദീഷ് മിശ്ര സംവിധാനം ചെയ്ത് ഒഡിയയിൽ പുറത്തിറങ്ങിയ ഹൊറർ സിനിമയാണ് ബൗ ബുട്ടു ഭൂട്ട. ബാബുഷാൻ മൊഹന്തി, അർച്ചിത, അപരാജിത മൊഹന്തി എന്നിവരാണ് ഈ സിനിമയിൽ പ്രധാന വേഷങ്ങളിൽ എത്തുന്നത്. മികച്ച പ്രതികരണം നേടുന്ന സിനിമ ഒഡിഷയിലെ ഏറ്റവും കളക്ഷൻ നേടുന്ന സിനിമയായി മാറിയിരിക്കുകയാണ് എന്ന റിപ്പോർട്ടുകളാണ് പുറത്തുവരുന്നത്. വമ്പൻ ബോളിവുഡ് സിനിമകളെ വീഴ്ത്തിയാണ് ഈ കൊച്ചു ചിത്രം ഈ നേട്ടത്തിലേക്ക് എത്തിയതെന്ന് പ്രത്യേകതയുമുണ്ട്.

പുറത്തിറങ്ങി 18 ദിവസം കഴിയുമ്പോൾ 15.10 കോടിയാണ് സിനിമയുടെ നേട്ടം. ഇതോടെ ഷാരൂഖ് ചിത്രമായ ജവാന്റെ ഒഡിയയിലെ കളക്ഷനെ ബൗ ബുട്ടു ഭൂട്ട മറികടന്നു. 14.75 കോടി ആയിരുന്നു ജവാൻ അവിടെ നിന്നും നേടിയത്. നേരത്തെ ഷാരൂഖിന്റെ തന്നെ പത്താന്റെ കളക്ഷനെ ഈ കൊച്ചു സിനിമ മറികടന്നിരുന്നു. 10.40 കോടി ആയിരുന്നു പത്താന്റെ ഒഡിഷയിൽ നിന്നുള്ള നേട്ടം.കെ ജി എഫ് 2, ബാഹുബലി 2, പുഷ്പ 2, എന്നീ സിനിമകൾ ഒഡിഷയിൽ നിന്ന് നേടിയ കളക്ഷനെ ഈ ഹൊറർ സിനിമ ഉടൻ മറികടക്കുമെന്നാണ് പ്രതീക്ഷ.

അല്ലു അർജുൻ ചിത്രമായ പുഷ്പ 2 ആണ് ഇതുവരെ ഒഡിഷയിൽ നിന്നും ഏറ്റവും കൂടുതൽ കളക്ഷൻ നേടിയ സിനിമ. 22 കോടിയാണ് സിനിമ നേടിയത്. ബാഹുബലി 2 15.50 കോടി, കെ ജി എഫ് 2 15.25 കോടി, എന്നിങ്ങനെയാണ് ഒഡിഷയിൽ നിന്നുള്ള ബോളിവുഡ് സിനിമകളുടെ കളക്ഷൻ. വൻ വിജയമാകുന്നതിനെത്തുടർന്ന് ബൗ ബുട്ടു ഭൂട്ട ഹിന്ദിയിലേക്ക് റീമേക്ക് ചെയ്യാനും പദ്ധതികളുണ്ട്. ഇതുവരെ ഒഡിഷയിൽ നിന്നും ഏറ്റവും കളക്ഷൻ നേടിയ രണ്ട് ഒഡിയ സിനിമകളെയും ബൗ ബുട്ടു ഭൂട്ട ഇതിനോടകം മറികടന്നു. ദാമൻ (7.50 കോടി രൂപ), കർമ്മ (6.50 കോടി രൂപ) എന്നിവയാണ് ആ സിനിമകൾ.

Content Highlights: Odia film Bou Buttu Bhuta beats bollywood films in Odisha